Educación Infantil Limpeza.

 O luns pola mañá dispuxémonos a facer a primeira das actividades a favor da Nai Terra. Esta vez tocoulles aos máis pequenos do centro. O alumnado de Educación Infantil foi quen se puxo “mans ao plástico”. Despois dunha pequena charla na que falamos da importancia de non tirar o lixo ao medio, diferenciando aquilo que é plástico do que son elementos naturais, puxemos os guantes e comezamos a tarefa.
Logo dun tempo de traballo, as bolsas comezaron a encherse. Temos que dicir que a praia de Area, comparada con outras, está especialmente limpa. Aínda así, a pesar de que parecía que non había nada de lixo, recollemos moitos restos de aparellos, cordas, algunha botella e tapóns e outros materiais. Os nenos e nenas tamén recolleron algo que lles pareceuun plástico, pero non o era. Atoparon un ovo de raia que confundiron con este material.

Despois da recollida tocou lavar mans e tomar unha boa merenda nas mesas. Nesa zona íanse fixando e vían tamén residuos no chan, moitos deles eran cabichas que a xente vai tirando por calquera lado. Se temos en conta que poden tardar máis dunha década en degradarse e o que supón para a Natureza (unha soa cabicha pode contaminar entre 8 e 10  litros de auga doce e ata 50 de auga salgada), igual podemos cambiar este hábito de ir sementando algo que prexudica enormemente os ecosistemas e empregar máis as papeleiras.
Foi unha xornada moi agradable, na que puideron desfrutar da praia doutro xeito, mellorando un entorno do que moitos dos nenos e nenas gozarán no verán.